ភ្នំពេញ៖ នាយករដ្ឋមន្ត្រីកម្ពុជា សម្ដេចតេជោ ហ៊ុន សែន បានបង្ហោះរូបរបស់កុមារាម្នាក់ក្នុងថ្ងៃបើកសាលាចូលរៀនឡើងវិញកាលពីម្សិលមិញកំពុងទាក់ទាញចំណាប់អារម្មណ៍ពីមហាជន។

សាររបស់សម្ដេចតេជោដែលបានសរសេរអមដោយរូបភាពកុមារាម្នាក់ក្នុងសភាពអាវស ខោខៀវ គ្មានស្បែកជើងពាក់ និងយកថង់មកច្រកកាតចាក់វ៉ាក់សាំងដើម្បីបង្ហាញថាគេបានចាក់វ៉ាក់សាំងរួចដើម្បីចូលរៀននៅថ្ងៃទី១ ខែវិច្ឆិកា បានទាក់ទាញចំណាប់អារម្មណ៍ពលរដ្ឋជាច្រើននៅលើហ្វេសបុកផេករបស់សម្ដេច។

សម្ដេចតេជោ សរសេរថា៖ «ទោះជារូបភាពមួយសន្លឹកនេះខ្ញុំមិនដឹងថានៅទីណា? និងចៅតូចនេះឈ្មោះអី? អាយុប៉ុន្មាន? តែខ្ញុំពិតជាមានមោទនភាពចំពោះចៅៗដែលចង់រៀនសូត្រ។ ប័ណ្ណចាក់វ៉ាក់សាំងពាក់នៅកបង្ហាញថាខ្ញុំបានចាក់វ៉ាក់សាំងរួចហើយ និងចូលរៀនដោយគ្មានការភ័យខ្លាចជាមួយនិងការពាក់ម៉ាស់បានត្រឹមត្រូវ។ ទោះចៅមិនមានស្បែកជើងពាក់ តែតាជឿថាចៅច្បាស់ជាលាងដៃនិងរក្សាអនាម័យបានល្អ។ សូមជូនពរចៅៗប្រកបដោយសេចក្តីសុខសេចក្តីចំរើននិងរៀនសូត្របានល្អ»។

យោងតាមការបង្ហោះរបស់សភាយុវពាណិជ្ជករអន្តរជាតិកម្ពុជាសាខាចតុមុខ កុមារាខាងលើគឺជាកុមារម្នាក់ក្នុងចំណោមកុមារចំនួនជាង ៩០០នាក់ នៅសាលាបឋមសិក្សាចំនួន ៤ក្នុងស្រុកបន្ទាយស្រី ដែលត្រូវបានទទួលអំណោយពីសប្បុរសជន និងបានថតកាលពីថ្ងៃទី៣១ ខែតុលា ឆ្នាំ២០២១កន្លងទៅ។

តាមការឆ្លើយតបក្នុងសារលើហ្វេសបុកផេករបស់សម្ដេចតេជោ កុមារាម្នាក់នោះជាសិស្សនៅសាលាបឋមសិក្សាជ័យ ស្ថិតក្នុងស្រុកបន្ទាយស្រី ខេត្តសៀមរាប។ ទោះជាយ៉ាងណា EAC មិនអាចទាក់ទងនាយិការសាលានេះអ្នកគ្រូ សុខ ញ៉ា បាននៅឡើយទេ។

ក្រសួងអប់រំកាលពីចុងខែតុលាកន្លងទៅបានសម្រេចបើកសាលារៀនទូទាំងប្រទេសឡើងវិញបន្ទាប់ពីបិទអស់ជាង ៧ខែដោយសារវិបត្តិនៃជំងឺកូវីដ-១៩។ ការបើកនេះស្របពេលដែលស្ថានភាពនៃជំងឺកូវីដ-១៩ នៅកម្ពុជាកាន់តែធូរស្រាល ហើយរដ្ឋាភិបាលបានប្រកាសបើកប្រទេសឡើងវិញជាដំណាក់កាល៕